John 5

Iesu Ga Lox Aroo Laradi Ro At Ladan

1Melemu at nai, limixin me Judaia diga lok leluxa silok to Jerusalem la ne Iesu gat pas tin. 2Ap mo lemenemen silok langas povolo silok gak lok, laasen teren ‘Langas Sipsip.’ Ladan kis gak lok saparav i, laasen teren at lavapaase Ibru do Betsaida; lavalimo lengkon gu mo gak lok. 3Buaang atnedi limixin digak meres la mo digak midi ap mo lavalimo lengkon gu; levengkatli main, la nedi bok di goxo epovo rit pas, la nedi bok lengkot atdi ga molo axap. [Digat kis ngais ladan kusu na vonen kaxat; 4mila at leventaba levenaleng laangelo at ne Moroa ga putup ap mo ladan la gak lox avonen i. La do laradi mekmeres ga los tup avot ap mo ladan do ga onen kaxat, neni naba lox avukat basinge lanmeres teren.] 5Lara laradi mo ga nemen, lanmeres gak lok teren at lavantun sangaun mi lavanuan maares axap. 6Iesu ga ven i gak midi go, la gaklen pam i do mo laradi gak meres at buaang laxanmaares; kuren la ne Iesu ga sue i, “Kereva, u vara box i do una lox avukat?”

7Laradi mekmeres ga vorang i rin, “Leeme Silok. Axo ruuna tara nade xusu naba lok li ia ro at ladan kis, do ladan i vonen kaxat. Nia ak lok tong i do anat los tup teren, ketla leventaba vetpes ta giat los tup avot ta ria”.

8Melemu ne Iesu ga lok tin, “Katu kaxat, kip kaka lempanga mikmidi ram la una onon.” 9Soso mun mo laradi ga lox avukat ta, la ga xip kaka lempanga mikmidi ren la ga vas kaxat.

Na lavanga sangsangu ga vot at laaleng kaala; 10kuren la luvuttadi amgomgo at limixin me Judaia diga lok ti mo laradi ga lox avukat, “Lingina ni laaleng kaala, la ixok mokso at Lenavolo atdik kusu unap kip lempanga mikmidi ram.”

11La ni ga lok, “Laradi no i lox avukar ia, i tong i ria do ana xip ka lempanga mikmidi rak la ana onon.”

12La diga sue i, “Nege nom laradi?”

13Ketla laradi no ga lox avukat goxoklen i do nege i mo laradi, mila buaang nedi limixin diga umsu ap mo loxot la ne Iesu no ga vas ekula kaxat pam.

14Melemu ba, Iesu ga vas panga ka i ro xeneng at loogu laplavang la ga lok, “Una ronga i na. Monga u lox avukat pam. Una xap ta rik lok laxakapmek; lavanga tavanga i lok kapmek aleng ba vot parav u.” 15Melemu mo laradi ga vas kaxat la ga tong i ri luvuttadi amgomgo at limixin me Judaia, do ne Iesu vam mo ga lox avukar i.

Luvuttadi Amgomgo Diga Puse Ngas Ti Sev Amet Ne Iesu

16Kuren la luvuttadi amgomgo diga ru ka i xusu dina munepen mi ne Iesu, mila neni ga lox aroo mo laradi at laaleng kaala. 17Iesu ga lok tidi, “Ne Tamak i gugu at levenaleng amisik se lingina, la nenia bok a gugu.” 18Na levelinga at ne Iesu ga lox axatu levendoxoma at luvuttadi amgomgo la diga puke ngas kusu dina sev amer i; lavasuun teren do ne Iesu ga lox aroo laradi at laaleng kaala, la neni ga tong i do ne Moroa ni ne Temen, la at na mun i neni ga tong i do neni i epovo mun mi ne Moroa.

19La ne Iesu ga lok tidi, “A tong tuturun i rinimi, nenia ne Nitna xopmen anak lok tevempanga mi lololos axa rak; nenia ak lok mun levempanga salai nenia a ven i at ne Tamak. Levempanga salai ne Tamak ik lox i, nenia ne Nitna bok ak lox i. 20Tamak i balamu ia, ne Nitna la ik lox ase ia mi levempanga salai neni axa ik lox i. Neni naba lox ase ia mi levempanga i silok aleng ti mo lempanga sangsangu, la nemi miba sangu aleng. 21Tamak ik lox axatu kaxat amlong nedi limixin diga met la im taba nedi mi lorooro; kuren mun la nenia ne Nitna am taba lorooro rinedi, nenia a vara i do ana raba di min. 22Tamak ga ke xepe lugugu ri ronga linga. Ketla neni ga raba vam ia, ne Nitna mi lololos kusu ri ronga linga, 23kusu limixin diba lok ngangao rak ne Nitna kerekngan mun di lok ngangao at ne Tamak. Do tara noxo lok ngangao rak ne Nitna, i lok ngan ta do ixo lok ngangao at ne Tamak, mo ga riki ia, ne Nitna ude.

24A tong tuturun i rinimi. Do tara i ronga levelinga rak, la i nuunu ap mo lara ga riki ia, neni ira lok ka vam lorooro avolo. Neni xopmen noxo tu at lavapaase at laaleng ete, ketla ira roo suu vam basinge lanmet la ira ruuna ka vam lorooro avolo. 25A tong tuturun i rinimi. Laaleng mo i auret la nangai ira vot pam la limixin diga met pam diba ronga linga rak, ne Nitna ne Moroa; la do nedi dina ronga res tarak, diba roo. 26Tamak, neni bok lavasuun at lorooro, kuren mun la neni ga lox ia, ne Nitna xusu nenia lavasuun at lorooro. 27La neni ira siam avolo vam ia, ne Nitna xusu anaba ronga linga at laaleng ete, mila nenia Laradi Mevana.

28Nemen mita sangu at nai mila laaleng naba vot la limixin diga met pam diba ronga laxaka tarak, 29la diba ru suu boro at lara maaut atdi; la nedi, diga lok loklok nunuan, diba xatu la dina rooro, la nedi digak lok laxakapmek, diba xatu la dinat pas uto at lemenemen songsongot. 30Nenia axo epovo do ana lok lempanga mi lodoxoma axa rak; a ronga res mun at levelinga ne Moroa i tong i ria. Kuren la mo do nia ana ronga linga, a lox i mi langas i ruturun, mila axo lok tong i do ana lok lugugu xerekngan nia a vara i, ketla a gugu mun mi lodoxoma ap mo lara ga riki ia ude.

Lempapaase Aru Mumu Ne Iesu

31Do nenia xusuk ana paase aru axa ia, levelinga nia a vaase i, noxo mumuat. 32Ketla ne Moroa i paase aru ia, la aklen i do mo levelinga ni i paase mu ia min, i ruturun. 33Miga riki luvuttadi vapaase atnimi uto at ne Jon, la ni ga tong asu levelinga ruturun mumu ia. 34Axok pakes ti levelinga at tentaba vetpes kusu ri lox axasev i do nia nege; ketla a tong na levelinga at ne Jon kusu nemi mina siam ka i la ne Moroa naba lox arooro nimi. 35Jon ga tong asu levelinga at ne Moroa la kerepmo ni ga lok ngan lababao i lox asu laxasep, la at leventaba leven gaaling miga lok momo ren.

36Ketla a ruuna levelinga mumu ia la i silok aleng ti levelinga ne Jon ga tong asu i. Leven gugu nia a lox i, ni leven gugu ne Tamak ga raba ia min; anai levempanga nia a lox i, i lox asuusu i do ne Tamak ga riki ia. 37La ne Tamak, mo ga riki ia, neni bok i paase aru ia. Nemi mi goxo ronga xibis tinotno laxaka ren, kopla mi gita ven labantuxu ren. 38La nemi mi goxom tebeng tu avarang at levelinga ren keneng at lorooro atnemi, mila nemi mi goxo nuunu rak, no neni ga riki ia ude. 39Mi reven mumu amisik Lovoang Kaala mila mi doxoma i do keneng teren miba vuse ka lorooro avolo. La mo levelinga i paase mumu ia. 40Ketla nemi xa mi xopara na nuunu rak kusu miba lok ka lorooro.

41Nia a goxo vot de xusu ti lok ka leemi asu. 42Ketla akleklen lebelen nimi. Aklen i do labalamu ri ne Moroa xopmen na nemen keneng at lebelen nimi. 43Agara vot eburu vam mi lololos at ne Tamak, ketla kopmen mina siam ka ia. Do tara na paase mi lololos axa ren, nemi miba siam ka i. 44Mi vavara i xusu miba lok ka leemi asu boro atnemi xa, ketla mi xopara i do mina lolos ka lomomo ri ne Moroa; la neni Lomoroa xusuk mun, kusu neni naba emi asu minimi. Kuren la i lolos aleng kusu mina nuunu.

45Nemen mita doma i do nia anaba sok taba nimi mi levelinga ro melamgo at ne Tamak do nemi miga lok laxapmek. Ne Moses axa neni naba sok taba nemi mi levelinga, mila nemi mi nunua i do ne Moses naba lok tooro nemi. 46Do nemi mi nuunu ruturun at levelinga at ne Moses, miba nuunu ruturun tarak, mila neni ga malagan mo levelinga mumu ia. 47Ketla mo do mixo nuunu at levelinga ren, miba nuunu ba xereva at levelinga rak?”